హృదయరాగం

స్మృతులో, అనుభూతులో, కదిలే కాలపు మరీచికలో,
ముప్పిరిగొనే ఆశలో, చిప్పిల్లి ఎగసే ఆనందపు జల్లులో......
అవి ఏవో కలబోసి, నాలోని నన్ను కదిలించి, మేళవించి,
కొనగోట మీటితే, అలలలలుగా పలికే  హృదయరాగం,
ఈ విపంచికా గానం..........

భావాలో, భావనలో పెనగొని ఉక్కిరిబిక్కిరైన వేళ,
తలపుల వాగురలో చిక్కుకొని ఊగిసలాడిన వేళ,
అది ఏదో తెలియక గుండెబరువెక్కిన వేళ,
మాట పెగలక, ఊపిరిగొంతుక మధ్యన చిక్కుబడినవేళ,
నినదించే నాదం, ఈ విపంచికా గానం.......

నిలిచిన చూపుల తపనలో,
ఆశగా కదిలిన కొసకంటి నీటి చినుకులో,
తడబడి తెరువు వెతికిన బేల చూపులలో,
విప్పారిన కనుపొట్ల మజ్జెన వెలిగిన వెలుగులలో,
పచరించు సరాగం, ఈ విపంచికాగానం.....

అట్టడుగున సద్దుసేయక ఒగియున్నదిన్నాళ్ళు,
తెరువు తోచినంతన, తబ్బిబ్బై దడిదూకి పలుకునిక
నా గుండెగొంతుక, ఈ విపంచికా రాగాలలో.....